Novena semana

Xa falta moi pouco para que os de Dios e os Faria rematen a súa estadía en 1907. Imos empezar a penúltima semana e todo apunta a que un dos animais máis prezados das casas vai parir. A vaca dos de Dios sae de contas, e todos están á expectativa por se se produce a boa nova. O nacemento traeralles ledicia, pero tamén máis traballo, unha situación que se verá agravada para a familia de Dios pola emigración de Manu: o seu fillo maior, e principal apoio de Manolo, irá facer as Américas. Veremos como acae a noticia na familia.

Polo demais asistiremos á última visita de Arturo, o vendedor ambulante, que deixa o negocio polas moitas débedas que tén. E remataremos a semana con algo moi especial: as familias farán augardente. Todo isto na penúltima semana da Casa de 1907. Todos os martes, mércores e xoves na TVG.

Os vosos favoritos

A estas alturas de programa, a relación entre os Faria e os de Dios pasa por un momento delicado despois de varios desencontros entre eles. E lóxicamente, esa competitividade entre as familias reflíctese tamén neste blog, así que imos aproveitar este post para que cada quen deixe a súa opinión e faga as súas apostas.

Propoñémovos que deixedes nos comentarios as vosas respostas a estas preguntas:
1) ¿Cal é a vosa familia favorita e por que?
2) ¿Quen pensades que vai gañar a votación do público?
3) ¿Cal é o voso concursante favorito e por que?

(Eso si, coma sempre, pregámosvos que opinedes en entrar en descalificacións. Polo demais, adiante).

Matanza en 1907

Xa se sabe que a cada porco lle chega o seu San Martiño, e hoxe lle chegará ó porco da familia Faria.

Vai ser día de matanza nas casas de 1907, e as dúas familias terán ocasión de colaborar xuntas baixo a supervisión dun experto matachín. Se os de Dios participan na matanza axudando ós Faria, poden consegui-la metade da carne do porco. Pero ¿están os ánimos como para que todos cooperen? ¿Chegarán os de Dios a un acordo... ou evitarán calquera negociación cos veciños? ¿Que tal se amañarán os Faria coa matanza do porco? ¿Todos tomarán parte ou haberá algún que se negue a participar?

O que si é seguro é que será un episodio espectacular, e podemos adiantar que a convivencia entre as familias empezará a cambiar a partir do que vexades esta noite.

Desde agora: martes, mércores e xoves

A partir de agora, TVG emitirá A Casa de 1907 os martes, mércores e xoves á hora habitual.

Estamos xa na cuarta semana de convivencia nas casas de 1907 e as dúas familias (os Faria e os de Dios) enfróntanse estes días a un desafío co que non contaban. Os homes marcharon á sega a Castela, tal e como facían os xornaleiros do século pasado, e deixaron ás mulleres e ós fillos sos. Agora, as nais e os rapaces terán que sacar adiante as tarefas diarias do campo e do coidado do gando. Pero o maior reto será a colaboración entre as dúas familias agora que faltan os pais... porque aparecerán algúns problemas.

Ademais, esta semana recibirán unha visita... conflictiva.

Remata a segunda semana

Hoxe remata a segunda semana de estancia nas casas de 1907, e ata agora tanto os Faria coma os de Dios teñen demostrado que son quen de adaptarse á vida de hai cen anos.

Pero esta noite o programa chega cheo de novidades. Desvelaremos que alguén fixo unha “pequena” trampa... e eso fará que xurdan sospeitas entre as familias. Ademais, veremos que dous concursantes de distintas casas lévanse moi, moi ben.

Despois do programa haberá debate en Luar... cunha sorpresa.

Hoxe empezamos!

Esta noite ás 21:30 comeza en TVG "A Casa de 1907" cun primeiro episodio no que coñeceremos ás dúas familias protagonistas (os Faria, de Moaña, e os De Dios, de Xunqueira) e veremos cómo lles vai no seu primeiro día nas casas.

A primeira novidade á que se van enfrontar este ano os concursantes será ó reparto das casas. Cada familia terá que decidir cal das dúas vivendas é a que máis lle convén e negocialo cos veciños.

Xa vos podemos adiantar que a negociación será MOI interesante.

Pero instalarse na casa é só o comezo, porque de inmediato as familias terán que facerse cargo do coidado dos animais... e este ano vanse atopar con varias sorpresas nas cortes.

A Casa de 1907

Moi pronto comezará en TVG "A Casa de 1907".

Nesta segunda edición do programa -mestura de reality show e documental-, dúas novas familias enfrontaranse ó reto de vivir coma labregos galegos de hai cen anos. Sen luz eléctrica, sen auga corrente e sen tecnoloxía moderna, vestindo roupas propias do século pasado, cociñando en lareiras, traballando o campo, coidando do gando...

Esta ano haberá, ademais, moitas sorpresas. Pode que os concursantes crean que coñecen ben o programa porque viron a edición anterior, "A Casa de 1906". Pero se pensan así... equivócanse.

Por exemplo... ¿estarán preparados para asistir a un parto? ¿Poderán poñerse de acordo sobre os lindes dos terreos? ¿Saberán traballar nos oficios de 1907?

Agárdanlles estas e outras moitas novidades, que pouco a pouco iremos desvelando e comentando neste blog, aberto polo equipo do programa.

Benvidos a esta segunda viaxe no tempo.